Azenario pastela (Carrot cake)

Azken egunotan hitz bat darabilkit buruan bueltaka: Hygge

Zer da hygge? Danimarkatik datorren kontzeptua da, bertako kulturan errotuta dagoena. Hitz honek ez du itzulpenik eta definizio azkar bat emateko, bizitzak eskaintzen dizkizun plazer txikiekin disfrutatzeko gaitasuna izango litzateke: lagunak, familia, domeketako gosaria familian, liburu bat irakurtzea euriak lehioa jotzen duen bitartean, lanegun baten ondoren etxera iritsi eta ardo kopatxo bat hartzen duzun bitartean afaria prestatzea, goxotasuna, bizipoz lasaia.

Denok sentitu dugu hyggea, ez diogu izenik jarri baina hor dago, edozein momentu eta bazterretan. Blog honek hygge sortzaile izan nahi du, eta azenario pastel hau baino Hyggeagorik, ba al dago? 

Moleskine errezeta-liburuan idatzi nuen lehendabiziko errezeta izan zen azenario pastelarena. Askotan egiten dut, jende mordoak probatu eta flipatu egin dute. Batzuek, azenarioa duela ikustea arraroa egiten zaie baina probatutakoan aurpegi aldaketa nabarmena izaten da.  Agian, irudituko zaizue osagai asko dituela baina egiterako orduan prestaketa oso sinplea da, lanik "zailena" azenarioak birrintzea dela esango nuke. Sobratuko zaizkizuen osagaiengatik lasai, zin dagizuet pastel hau behin eta berriz egingo duzuela. Erabiliko dugun irina legamiarik behar ez duena da, legamia baduelako irin horrek, paketean "bizkotxoak egiteko berezia" dela jarriko du. Baina, aukera dago ohiko irina erabili eta royal botatzeko.

Goazen imaginatzera hygge momentu bat pastel honekin: igande goizean esnatu eta aurreko egunean egindako pastelak utzi duen kanela usaina nabarmena da. Euria ari du kanpoan. Sukaldera joan eta irratian liburuei buruzko programa bat entzuten hasten zara kafea prestatzen duzun bitartean. Nahastu egiten dira kanela eta kafe usain gozoak. Mahaia prestatu eta familian gosaltzen duzue eguneko planak egiten dituzuen bitartean: ikusiko duzuen filma, adibidez. Eta, zergatik ez? Kandela batzuk pizten dituzue momentu horri goxotasun berezi bat emateko. Bakarrik nagoenean, liburu bat irakurtzen dudan bitartean gosaltzea, hori bai hygge.

Konbentzituta? Goazen errezetarekin!

Errezeta: Azenario pastela

Osagaiak

175 ml ekilore-olio

135 g azukre beltz

3 arrautza (irabiatuta)

175 g azenario birrindu

85 g mahaspasa

50 g intxaur (txikituta)

Laranja baten azala (birrinduta)

175 g irin (legamiarik behar ez duena)

Koilaratxokada bat sodio bikarbonato

Koilaratxokada bat kanela-hauts

½ koilaratxokada intxaur muskatu hauts

Glasatuarentzat:

200 g gazta (philadelphia motakoa)

100 g azukre-hauts

2 koilaratxokada laranja zuku

Prestaketa:

1. OSAGAI LIKIDOAK NAHASTU

Labea piztu 180 graduan. Olioztatu 20-23 cm diametroko molde bat, guk kasu honetan, 23x10 cmko molde laukizuzen bat erabili dugu. Katilu handi batean irabiatu olioa, azukrea eta arrautzak. Gehitu azenarioa, mahaspasak, intxaurrak eta laranja azal birrindua.

2. GEHITU OSAGAI LEHORRAK

Iragazi irina, bikarbonatoa, kanela eta intxaur muskatu hautsa osagai likidoen nahasketaren gainean.

3. NAHASTU

Egurrezko espatula edo koilara batekin nahastu kontuz, mugimendu bilgarriekin eta  gehiegi mugitu gabe, ez da komeni gehiegi nahastea. Irin arrastorik ikusten ez duzunean pasatu nahasketa moldera eta egosi 35 minutuz edo eginda dagoela ikusi arte (sartu labana eta garbi ateratzen denean eginda egongo da). Atera labetik eta utzi moldearen barruan hozten 10 minutuz. Atera moldetik eta utzi hozten.

4. GLASATUA PRESTATU

Nahastu gazta, azukre-hautsa eta laranja zukua sardexka batekin nahasketa homogeneo bat lortu arte. Bota bizkotxoaren gainera eta espatula batekin estali bizkotxoaren goi partea.